Раськень Озкс

Википедиясто материал - аорев содамкундосто
Раськень озкс. Штатолонь кирвазтема

Раськень озкс — те эрзятнень озномань покшчи.

Раськень озксонть смустезэ

Озкстнэ эрсить кудонь, буень, велень. Сехте покшось - те Раськень озкс. Сондензэ башка лия озкстнэ ютавтневить эрьва иестэ, кой-конат натой зярыя иес весть. Раськень озксось ютавтневи аволь сеедьстэ. Архивсэ ванстозь сёрмадовкстнэнь вельде содави, седикеле те озксось ютавтневиль 50 иес весть. Те ульнекшнесь чопода пингетнестэ, зярдо раськенек велькссэ гувныль зыян. Неень шкасто Раськень озксонть ютавтнить седе сеедьстэ.

Ютась меельце Раськень озксось, ды сонзэ Атянь эземсэ покштятне вейсэ арсилизь, косо ды зярдо ютавтомс сы Раськень озксонть. Аравтнесть прявтт - Озатя, лездыцят ды пазпалонь (штань, ярмаконь, ямксонь ды лия мезень) пурныцят. Озкспалось, лиякс меремс, коень каявксось, Раськень озксонть ютавтомга пурнавиль эрзянь весе буетнева–велетнева. Те вейсэнь тев.

Озксонь пурнамот-арсемат

Васняяк ушодыльть пурнамо шта, ярмакт, идем ракшань прят-серькат. Штась эряви покш штатолонь валомга. Ярмактне ды лия мезесь пурнавить букань, ревень рамамга, конат мейле печкевить озкспалокс покшчинь ютавтома шкасто. Штатолось теевиль салава, кортыльть, вирьсэ, кияк илязо сода.

Штатолось эрсиль 40 пондонь сталмосо. Ютазь Раськень озксонь штатолось кадови се буентень, косо ютавтозель меельце покшчись. Кирвазтилизь буень озксонь ютавтомсто. Ловови, те штатолось канды покш вий. Покштятне ёвтнильть, штатолонть кекшнилизь мода потс, аволизь муе ятт-душмант. Бути муевлизь ды янгавлизь-колавлизь, те улевель покш пежетекс, кандыль зыян буентень ды весе раськентень. Озкспалонь ярмактнеяк кекшевильть ды куш кодамо стакачи аволь уле эрямосонть, а токшевильть, секс мекс сынь алтазельть Инешкипазонтень.

Вана кадовиль вейке ие од Раськень озксонь ютавтома чинтень. Се велентень, косо эрясь прявт Озатясь, пурнавильть эрзянь весе ёнкстнэстэ ды буетнестэ озксонь ветицят, арневикс покштят, велень прявтт. Ды, нама, сонсь Инязорось ютавтыль Инекужо. Те Инекужосонть арсевильть сы Раськень озксонть весе ёнкстнэ, аравтовильть весе буетнестэ озксонь прявт ветицят, брагань теицят, букань ветицят, сюронь, ямксонь, медень пурныцят, седицят. Теке марто арсевсть сеть кевкстематне, конат кармить ванновомо Атянь эземсэ ды лия мезе. Вана Раськень озксонь ютавтома таркась кочкавиль, ансяк чись ёвтавиль таргодо икеле, илязт сода ятт-душмант ды лия раськень ломанть.

Сеть шкатнестэ душмантнэ теке кренчть учость кода сускомс седе тантей пелькс лия раськестэнть. Ды, нама, Раськень озксонь ютавтома шкастонть эрзянь ушмантнэстэ седе ламотне якасть озксонь ютавтома таркань ванстомо зыянонь а лисемга.

Озкспалонь пурнамо

Эрзянь эрьва буетнесэ пурнавильть ломанть, улавт, лишметнень мазылгавтылизь парсеень сюлминесэ, баягасо, каштазсо ды сыргильть буень велетнева озкспалонь пурнамо, Раськень озксто яволявтомо.

Икелев мольсь Озатя. Кедьсэнзэль Пазтешксэнь палмань. Вакссонзо кавто од цёрат пувильть дорамосо. Неть молицятнень-сыцятнень эрзянь велетнесэ марилизь васолдо. Ломантне лисильть велень куротнень ортатнес пазморо марто. Кудотнень икеле анокстазельть стуворт, косо палсть кудонь штатолт ды анокстазель озкспал-каявкс. Велень совамо ортатнень икеле ютавтовиль апокшке озкс, кирвазтевиль штатол. Озатясь пшкадиль истямо озолма марто:

Инешкипаз! Вере Чипаз! Чангодть!
Вана сынек озкcпалонь пурнамо,
Велень раськенть варштамо,
Вейсэнь озксов, Пазонь кужов,
Велень эрийтнень минь тердтяно,
Ине чанстесь, ине эрьмесь,
Покштянь-сырдянь ине лувось,
Эрзянь велесэнть свал эрязо,
Чачи сюро, ракшань-ракша,
Эйдень-эйде, шумбра рунгот,
Валдо ойметь ды Паз, чангодть,
Эрзянь велесэнть свал улезэ.
Инешкипаз, чангодть! Паз, чангодть!

Эрьва кудонь аватнень викшнезь нардамо лангсо кепедилизь верев Пазонтень алтазь кшинть ды серьгедилизь «Паз, чангодть!» моронть, сыргильть Озатянть ды озкспалонь улавонть мельга велень куротнева. Тосо пурнавиль каявксонь озкспалось (ямкст, алт ды ламо лия мезе).

Озксонь чинть ёвтамо

Зярдо весе эрявиксэсь пурнавильть ды ёвтавиль озксонь чись, Пазонь кшитне нардамо марто путовильть парьс. Озатясь ды лездыцянзо велень ортатнень икеле сюкониль модас эрицятненень ды мериль истя:

Сюкпря ды Пазонь чансть тенк, мельвановикс раськеть!
Озкспалонк вадря ды анокстазь валдо мельсэ, вейсэнь Марось
Учи эйсэнк, пачкоде ды моледе, вейсэндяводо вейс эрзянь весе раськенть марто,
Кундасынек вейсэ покштятнень лемест.
Пшкадтяно вейсэнь озолмасо Инешкипазонтень. Паз, чангодть!

Истя пурнавиль озкспалось ды эрзятне тердевильть весе буетнестэ.

Сась шка велень эрицятнень анокстамост Раськень озксонтень. Те покшчись ютавтневи сюконьчистэ, ансяк ковонь прядовоманзо лангсо зярдояк а ютавтневиль. Те эрсиль пешксе эли од ковонь ушодовомсто.

Кундамга банят

Эрьва буесэ покштятнень лемест кундамга уштовильть шлямо кудот (банят). Ломантнень оймест ды рунгост улезт ванькст. Те покшчинтень алтавильть–анокставильть мазыйстэ викшнезь од оршамопельть. Банядо икеле азораватне анокстыльть покштянь моргат. Зярдо чись ульнесь валгома лангсо, банясь аноколь. Буень сехте сыре ломанесь саиль озкспарго, озкскескав ды сыргиль калмазырев, косо калмазь раськетне. Эрзятнень ули истямо кой: вейке буень-раськень ломантнень калмилизь калмазырьсэ вейке таркас. Истямо коесь ули нейгак. Саемга,Самара ёнксонь Пестравка буень Красная поляна рузонь велесэнть эрить 5 кудот эрзят, ансяк калмазырьсэ эрзятне калмить кулозь раськест рузтнэде башка. Покштясь ютавтыль озкс ды саиль эрьванть калмонзо лангсто коморонь–коморонь мода ды ловныль озолма. Эряви меремс, седе тов калмазырев совамодо икеле ды тосто лисемадо мейле калмонь ортатнень икеле путневи озкспалнэ - те калмонь азоронтень. Тень пингстэ энялдыть чумочинь нолдамга, мекс сыцясь колызе эсензэ самосо калмазыренть ды кулыцятнень сэтьмечист:

 Инешкипаз, чангодть!
 Масторава-авинем,
 Масторкирди-тиринем!
 Иля тандадо кеднедем,
 Иля тандадо пильгедем,
 Састо нарот лутаса,
 Тикше саннэтнень явсынь,
 Чевте модат таргаса,
 Пацине потс каяса,
 А томбаса, а правтса,
 Вейсэнь Маронть лангс кандса,
 Масторава-авинем,
 Масторкирдий-тиринем!
 Кода модань паморькстнэ
 Вейке Марс вейсэндявить,
 Истя эрзянь ломантне
 Кадык раськекс пурнавить!
 Инешкипаз, чангодть!

Модань саема ды сонзэ смустезэ

Покштясь саиль мода кардаз юртсто. Теде мейле покштятнень лемест кундамга ломантне шлильть банясо, тердильть-ёвтыльть сынст лемест парямсто, тенст алтавиль башка тенсть, кона а токшевиль. Оршнильть покшчинь од оршамопельсэ, парямодо мейле кадыльть Банявантень ведь ды тенсть.

Кудосо аноколь лемень кундамга моргась. Кирвазтевиль штатол ды ютавтовиль Инешкипазонтень ды Покштятненень озкс.

Озксонь икеле валске

Пурнамот

Валскестэ саезь эрьва кодамо велестэ Раськень озксов молицятне пуромильть велень куншкас. Эрьва буесь сайнесь мартонзо буень тешкс. Эрьва буенть ульнесь эсензэ тешксэзэ. Ало сюлмазельть мазыйстэ викшнезь нардамот.

Ушмантнэ понгавтнилизь сялгозост чачома масторонь кисэ тюрематнесэ чавозь яттнэнь прякиськест. Се ушманось, конань сялгосонзо ульнесть сехте ламо ятонь прякиськеть, лововсь-яволявтовсь маралякс. Раськень озксов молицятне сайнесть мартост ярсамопельть: прякат, пештть, пидезь алт, сайнесть пенчть-вакант, нардамот, буень штатолт. Кудосто лисемадо мейле кадовикс азоравась панжилинзе келес кардо ортатнень, валыль ведь туема кист ёнов ды мериль:

 Инешкипаз, чангодть!
 Вить пильгинесэ лиссть сынь кудосто,
 Шумбрасто-паросто
 Вить пильгесэст
 Мекев кудов совазт.
 Кода ведьбрясь стамбаро
 Ваньксстэ масторавантень сови,
 Истя кист улезэ шожда ды шумбра.
 Паз, чангодть!

Озксов молицятнень мекев велявтомазост ортатне ульнесть панжадот, кудосо кияксонть эзть тенсекшне, эзть кодакшно-стакшно, кист илязо тапаряво.

Улавсо ардомат

Зярдо Раськень озксов велестэ молицятне пурныльть зярыя улавт, лишметне мазылгавтозельть нардамосо, каштазсо, велень озатясь саиль торо ды теиль кавксоньгирьдань черькст те покш улавонть перька. Мейле велестэ весе сыргильль пазморонь моразь, гайгильть седямопельть: нудейть, кайгат, чавомат, кальцяемат, пувамот ды лият.

Кши-сал марто вастыть мельвановикс сыцятнень. Эрьва кудосонть анокт максомс удома тарка. Гай моли велетнесэ. Тесэ ёвтнемат, вейкень-вейкень куватьс а неемадо лайшемат, морот, киштемат. Од цёратнень ды тейтертнень сельмест прок сиянь покольнеть яла леднить, паряк мусызь вечкемаст. Весе оршнезь мазыйстэ-ваньксстэ, туезь сэредицятнень ванныця содыйть, ормань пичкавтыцят.

Озатянь пурнамо

Удома арась, велетне теевить прок покш ошокс. Ансяк аволь весе элякалить. Моли покш анокстамо вандынь чинтень. Ламо буень озатятне ды прявттнэ пуромить вейс. Весе арсить седе, мезесь анок озксонтень: озкспалокс ракшатне, брагась, медьарвось, коень ютавтыцятне. Весе неть ёнкстнэнь, ютавтома пелькстнэнь тагояк арсекшнесызь пек парсте.

Пазонь штатолонь путома

Зярдо чизэ валгиль, ускокшнызь ды стявтокшнызь тарказонзо Ине Пазонь штатолонть. Ямонть пидемга анокстыльть пенгеть.

Чокшнень ванстомань кой

Веньберть прявт озатясь сувтамо толбарго ды колмо од тейтерть якстере поназь суре марто ютавтыльть апародо пирямо-ванстома кой. Икелев молиль озатясь, теиль те сувтамо паргосонть вить ёндо керш ёнов молема. Тейтертне черень нолдазь якстере суренть каильть масторонть ланга. Истя ютыльть Маркужонть перька. Суренть сюлмилизь сисем сюлмосо. Прявт озатясь кадовиль Пазонь штатолонть ваксс валскес, ознось, ёвтнесь кортавтомат, энялдомат-пшкадемат кода Инешкипазонтень, истя покштятненень ды пертьпельксэнь кирдийтненень-аштийтненень.

Раськень озксонь валске

Раськень озксонь покшчинь валскестэ весе велетнесэ гайгезевить дорамонь гайть, весе пурнавильть озномо. Озкспалонь букатне-ракшатне шлязельть, мазылгавтозельть цецянь каштазсо ды сувтазельть-чанстязельть. Икелев молить крандазс кильдезь мазылгавтозь лишметь. Улавтнесэ сынь ускить брага ды медьарво. Весе озкспалтнэ вачкавить парьга. Лишметнеде мейле моразь ды киштезь ветявить букатне-ракшатне.

Озксатятнень Маркужов самост

Весемеде икеле мольсть мельвановикс покштятне ды озатятне. Яндавасо медьарво, штатол, кши-сал. Колмо тейтерть озкспаргосто кинть ланга каильть-почодыльть комолят. Озксов весе сыцятне пурнавильть ды совильть Маркужонтень, шумбракстнильть ды арсильть вейкень-вейкень туртов Пазонь чансть. Озксонь ветицятнень лездыцяст анокстыть-аравтнить озкспал моргатнева, туевть озкспалт.

Эрий толонь теема

Вейке сыре ава моли кеменьшка тейтерь марто лисьмапрянтень ды сынь ютавтыть Ведьавантень озкс. Кармить кандтнеме ведь лемень кундамонь ямонь ды кашань пидемга. Озатясь карми тееме эрий тол. Саи кедезэнзэ коське лазнэть ды карми ёзамо эйсэст. Неть лазнэтне састыне ушодыть ченгеме. Озатясь ченгема таркатнень лангс путы коське ды чевте тикшень паморькс, ёвты истямо озолма:

 Инешкипаз, чангодть!
 Толава, парава,
 Сырнень тюс азорава!
 Састынькине кирвазтя!
 Шождынестэ сыремтя,
 Иля уле пултыцякс,
 Иля уле чентицякс,
 Ульть миненек лездыцякс,
 Толпаргонь ушодыцякс,
 Ульть валдонь максыцякс,
 Раськень озксонь
 Толбандянь ушодыцякс.
 Састо палт! Састо палт!
 Састо палт! Паз, чангодть!

Букань печкема

Озатясь сыремтьсы озксонь ушодома штатолонть ды сырги кирвазтеме лемень кундамга ямонь-кашань пидема толбандятнень. Озатясь сувтасынзе ракшатнень, браганть, медьарво марто партнень - весе сень, мезесь анокстазель Пазпалокс. Букань печкицятне анокстыльть букатнень. Озатясь сувтылинзе, мейле сынст ланга валовиль ведь. Бути букатне састыне сорнозевильть, те лововсь Инешкипазонть мельс тусь те озкспалось. Букань печкицятне анокстазь пеельтнесэ печкилизь ракшатнень, веренть нолдылизь мода потс, сывеленть керсилизь лангсо ды каилизь цюгунга. Кашань пидицятне анокстыльть каша.

Озксонь ушодовома

Эрзятне совить Маркужов

Весе дорамотне серьгедить эсь гайтьсэ. Озксов сыцятне пурнавить Ине штатолонть перька. Маркужонть чилисема, лембе, чивалгома, пелеве ёнкстнэстэ покш ды мазылгавтозь торо марто куншкас молить ниле цёрат. Сынь панжить виень, эрямонь ниле ёнкстнэнь, пачкодить ды токавтсызь торотнень штатолонть велькссэ.

Ине штатолонь кирвазтема

Озатясь лездыцянзо марто чивалгома ёндо кузи мар губорьксэнть лангс ды сюкони ниле ёнов. Кедьсэнзэ штатол. Те шкасто кармить чавомо гонгипарьс, чавомас, кальцяемас, седить нудейсэ. Озатянть колмо лездыцянзо кепедьсызь верев Ине штатолонть кирвазтеме. Зярдо толось токи штатолонтень, ниле ёнксонь панжома торотне явовить. Пазонь штатолтнэ валовильть-анокставильть свал истя, верьксэст мольсь пувордазь кикс ёнов. Весе раськесь колмоксть серьгеди: Паз, чангодть!

Озксов весе сыцятне стить кумажа лангс, кедест кепедьсызь верев. Прявт озатясь ушодсы Инешкипазонтень озксонть, конань мельганзо ёвты весе раськесь:

 Инешкипаз! Вере Чипаз!
 Тон, марицясь, кода тикше касы!
 Тон, неицясь кода пеште панжи!
 Неемизь, марямизь,
 Сюконятано пильгезэть,
 Пшкадтяно валдо оймезэть.
 Верев кепедьсынек кеденек,
 Масторов нолдасынек сюкпрянок.
 Ознотано эрицянок кис,
 Ознотано раськенек кис,
 Ознотано эйденек кис,
 Паксясо видезенть кис,
 Кардазсо ракшанок кис.
 Инешкипаз! Макст тенек
 Сэтьме, лембе пиземеть,
 Валдо, маней чить,
 Чачост-касост сюронок,
 Касост-кепетевест тяканок,
 Раштыцят улест аванок,
 Макст масторонтень ладямо,
 Вейке-вейкень вечкема,
 Лисьмакс парот лисезэ,
 Леекс эрьметь чудезэ.
 Кенкшпряваяк совазо,
 Кенкшалгаяк ютазо.
 Минь тонеть — шумбракши!
 Тон миненек — шумбрачи!
 Ванстомизь, идемизь
 Ятонь ломанде, ормадо-тармодо,
 Апародо-зыяндо,
 Даволдо-цярахмандо.
 Вана пидинек ашо кеднесэ,
 Вана панинек шожда мельнесэ,
 Зяро кашасонть ямкстнэде,
 Зняро макст эрьвантень ули-паро.
 Паз, чангодть! Паз, чангодть!
 Паз, чангодть!

Покштятнень ды Покшаватнень тердема

Весе сюконить модас. Серьгедеви "Паз, чангодть!" моро. Мейле озатясь тердьсынзе озныцятнень пшкадеме озолмасо Покштятненень ды Покшаватненень. Озатядонть мейле весе таго ёвтыть те озолманть[1]:

 Эрзянь покшт-покштинеть,
 Покштянь-покшавинеть!
 Сырк мерезэ покштинеть,
 Матразь-оймазь киськиненк,
 Раужо човаля модыненк.
 Вана тердтядызь озксов
 Кши-салонок варчамо,
 Пурень-прагань корштамо.
 Ашо кедьсэ панинек,
 Шожда мельсэ пидинек.
 Садо ваксозонок,
 Човоряводо юткозонок
 Начтынк коське турвиненк,
 Пештинк вачонь пекиненк,
 Таньшкавтынк сэпей кургиненк.
 Кинь лемезэ кундави,
 Кинь лемезэ стувтови,
 Илядо кежиявто,
 Весе тынь — седейсэнек,
 Весе тынь — минек верьсэ.
 Минь тынк эйстэ лисинек,
 Минь тыненк велявттано.
 Садо, весе садо!
 Илязт уле ве ёндо ваныцят,
 Илязт уле сельмень сявадыцят.
 Пачкодезэ, молезэ!
 Паз, чангодть!
 Паз, чангодть!
 Паз, чангодть!

Лисить Эземс озыцятне

Озатясь серьгеди-терди Эземс озыцятнень. Штатолонть малас пурнавить эрзянь раськень весе маралятне, инязортнэ ды эсь мелень ёвтыцятне.

Васняяк лиси Тюштянь мелень ёвтыцясь–эземс озыцясь. Ды Тюштянь оймензэ пельде пшкади эрзятненень. Мейле озатясь серьгеди:

"Пингеде–пингес эрямо Тюштя инязоронтень!"

Весе пуромозтне серьгедить ды вачкодить вить пильгсэст модас.

- Эрямо!

Истя вейке-вейкень мельга раськенть икельга ютыть весе содавикс ломантне. Меельцекс озатясь серьгеди: Пингеде-пингес эрямо эрзянь раськентень!

Весе:

- Эрямо! Эрямо! Эрямо!

Маронь одкстомтома

Маронть маласо умок учость сокас кильдезь ды каштазсо, эрьва кодамо тюсонь кикссэ ды мазыйстэ викшнезь нардамосо лишме. Соканть удало од цёра ды кавто од тейтерть. Лишменть ветить мар чирентень. Пазонь штатолонть эйстэ таргавить ашо, якстере, раужо тюсонь колмо кикст. Сынь сюлмавить лишмень чирькентень.

Якстере тюсось - те Инешкипазонь тюс, чинь тюсось - те икелень эрямо, ашо тюсось - те эрямось ванькс тюс. Раужо тюсось, нама, сюлмави Мастораванть ды Тоначинть, покштятнень-покшаватнень марто. Чилисема ёндо икелев моли Прявт озатясь. Мельганзо кши-сал ды брага марто лездыцят. Мельгаст сырги лишмесь. Ушодови эрямочинь теема. Сокасонть модантень тееви кикс. Сонзэ эзга ютыть озксов сыця весе раськетне. Лишменть ютамсто морави «Паз, чангодть!» моро.

Модань каямо кой

Файла:Rasjkenj Ozka- Modan kajamo.jpg
Эрзянь Раськень Озкс Модань каямсто

Седе тов ломантне стить вейкест–вейкест мельга чилисема ёндо. Васенцекс каить мода сехте покштне. Теке а сезевиця рисьмекс раськетне теить ютамо маронть перька ды эрьвась каи паргинестэнзэ, пацине потстонзо мода, конань кандызе эрямо таркастонзо. Истя тееви ине сюлмавкс Покштятнень, Инешкипазонть ды Пертьпельксэнь кирдийтнень марто. Раськесь вейсэндяви кода вийтнень, истя эрзянь весе ломантнень марто. Тееви кеме ды шумбра раське. Озатясь ды лездыцянзо чанстить эрьва ломаненть шумбракшинь палсо ды медьарвосо. Эрьвантень озатясь мери:

 Инешкипазось чангодезэ теть пазонь эйкакш! Паз, чангодть!

Морави «Вейсэ, эрзят, виевтяно!» моро

Марось састыне тееви покш губорьксэкс весе раськенть виензамонтень ды эрямонь сюпавчинь покшолгадомантень. Модань каицятне, конат чанстязельть, састыне кундыть кедте-кедьс. Маркужось тееви прок шкань сюлмавиця ды зярдояк а сезевиця сурекс. Маронть перька теевить ломанень зярыя кикст, конатне мейле весе Маркужованть кармить вейсэнь Пазонь моро марто тееме пурдавозь ломанень кикс, кона келейгады ды покшолгады.

Васняяк морыть пазморот ды раськень вельмевтема-вейсэндявома морот. Саемга, «Вейсэ, эрзят, виевтяно!». Содазь, те морось теевсь весе эрзятненень прявт морокс:

 Вирев молян, (2-ксть)
 Чувто керян, (2-ксть)
 Сока теян.
 Сока теян, (2-ксть)
 Пакся сокан, (2-ксть)
 Кансть мон видян.
 Кансть мон видян, (2-ксть)
 Коцтке кодан, (2-ксть)
 Панар викшнян.
 Панар викшнян, (2-ксть)
 Кужов лисян , (2-ксть)
 Эрзят тердян.
 Садо, эрзят, (2-ксть)
 Садо, ялгат, вейсэнь моро моратано.
 Вейсэнь моро (2-ксть)
 Моратано.
 Вейсэ, эрзят, мазыйтяно.
 Вейсэ, эрзят (2-ксть)
 Мазыйтяно,
 Вейсэ, эрзят, виевтяно!

Зярдо эрзятне пуромить, весе серьгедить:

«Инешкипаз! Чангодть! Минь тонь эйдеть, минь эрзят! Минь раське!» - ды кедест кепедьсызь верев. Мейле ломантне таго срадыть весе Маркужованть.

Раськестэнть куломань панема кой

Кармить анокставомо-топавтовомо койть-илат. Мейле озатясь серьгеди: "Раськеть! Маронь одкстомтыцят, Инешкипазонтень пшкадинек, покштянок-покшаванок юткозонок тердинек! Ней сась шка ютавтомс раськестэнть куломань панема коенть!". Весе серьгедить: "Панема, панема сонзэ, туезэ, кадозо минек раськенть!".

Кужонтень та-косто апаро чамакссо лиси содов ды рудазов оршамосо Куломатя. Кедьсэнзэ чакш ды пеель, конатнесэ кальдерди чакшонтень. Апаро вайгельсэ рангсты:

- Эрьга, те кие ды кить терявтнить монь марто пелькстамо, монь панеме? Паряк тынь, эрзятне? Варчасынек, кие седе виев. Монь чакшось коськсь верьтеме, сась шка сонзэ пештямс эрзянь ломанень верьсэ.

Куломатясь чийни ломантнень юткова тандавтни эйсэст. Эрзятне кеместэ кундасть кедте–кедьс. Куломатянтень те ломанень киксэсь а сезеви. Кармить марявомо чавомань ды гонгипарень гайть. Куломатянтень та-косто сырги сэрей од цёра ашо оршамопельсэ ды мизолдыця мазый чамаксо. Эсь чамась эзь мереве невтнемс Куломатянтень, аволинзить муе удомсто эли килангсто. Цёранть кедьсэнзэ гонгипарь. Кушаксонзо тонгозь мазый пеель. Цёрась карми чавомо гонгипарентень, чийнеме Куломатянть перька, ушоды верьга вайгельсэ моро, конань сонзэ мельга кармить морамо весе раськетне:

 Вайя йех, вая-ваяя ваяя, эрьга раськеть, киштетяно,
 Ваяя-ваяя, ваяя йех, ваяя йех Пазонь моро серьгедтяно,
 Куломанть минь шаштавтсынек, куломанть минь паньсынек,
 Вейсэ, эрзят, виевтяно, ваяя йех, ваяя ех, Пазонь чанстесь мартонок,
 Ваяя-ваяя, ваяя йех, киштеде-киштеде, морадо-морадо,
 Ваяя-ваяяех вить пильгсэнек тостядтяно, кеднесэнек люкштядтано,
 Ваяя-ваяяех, тук эйстэнек кулома, оргодть тестэ кулома, кулома.
 Ваяя-ваяяйех, кадык ули чачома, кадык ули касома, ваяяйех-ваяя,
 Эрзянь раськесь эрязо-эрязо, ваяя-ваяяя-ех, эрзянь коесь улезэ-улезэ,
 Зыян-кажось туезэ-туезэ, ваяя-ваяяйех, свал эрямо улезэ-улезэ,
 Ваяя-ваяяйех, эрьга мирём серьгедтяно, куломантень минь мертяно,
 Седе васов тук эйстэнек, иля токше тон раськенек, ваяя-ваяяех,
 Шумбрачи-шумбрачи, од чачома, Паз, чангодть, кулома стувтык корот,
 Тук эйстэнек седе васов, седе васов модамасторонть потмос,
 Ваяя-ваяяех, весе апаронть паньсынек, раськень ойменть вельмевтьсынек,
 Покштянок минь ледстясынек, Инешкипазонь эрьмесэнть раськенек минь
 Чанстясынек, ваяя-ваяяйех, эрямо-эрямо, чачома-касома, Паз, чангодть! Паз, чангодть!
 Минь киштинек, минь морынек, куломанть, эрзят, изнинек ваяя-ваяяйех,
 Эрядо, морадо, ойменк свал тынь ванстадо, эрзякс свал тынь уледе,
 Ваяя-ваяяйех Инешкипазнэнь кемеде, шумбра раськекс, кеме раськекс
 Свал уледе! Ваяя-ваяяйех, Паз, чангодть! Паз, чангодть!

Неяви, Куломатясь тандадсь, коень моронь морыцясь сонзэ кундасы кутьмере ёндо. Куломатянть кедьстэнзэ пры чакшозо ды пеелезэ. Атясь карми энялдомо мартонзо пелькстыцянть икеле. Ансяк коень ветицясь чалги Куломатянть мештес ды серьгеди лездыцят ёртомс сонзэ Маронь кужостонть. Лисить 4 цёрат, конат кедте ды пильгеде сайсызь Куломатянть, кандсызь толбандянть чирес, сайсызь чакшонзо-пеелензэ, ноцковтсызь лангстонзо раужо оршамопелензэ ды толонтень ёртсызь чамаксонзо. Куломатянь налксицясь кекшсы чаманзо эсь кедьсэнзэ ды састыне оргоди. Куломатянь оршамопельтнень паломсто карми гайгеме киштема моро. Весе киштить, морыть ды серьгедить: "Паз, чангодть!".

Озатясь серьгеди: Раськеть! Адядо невтьсынек эсь прянок Инешкипазонть ды Покштятнень, Кирдийтнень-аштийтнень икеле! Ушодтано ёрокчинь ды каштанчинь пелькстамот–невтемат.

Пелькстамот

Цёраксчис совавтома кой

Пелькстамотнень ушодсызь од цёрынетне, конатнень ламо иеть тонавтсть ушмодеень ды лия цёрань тевень топавтома. Од цёрынетне леднить налсо, ёртнить торот, узернеть ды лия мезе. Мейле Инязорось ды буень-велень прявт атятне ютавтыть цёраксчис совавтома кой.

Од цёрынетнень карксамост карксавить каркссо. Прязост сюлмави цёрань кикс. Тенст казевить налт, торот. Тейтертне казить викшнезь кедьпацинеть, килангонь кескавнеть. Цёрынетненень максовиль омбоце лем. Саемга, Каштан, Овтай ды лия. Ней сынь цёрат-ушмант, сыненст те чистэнть саезь мереви: кинь ули мелезэ урьвакстомс - прячертне нарамс а эрявить. Лововсь, прячертне - те вий. Ды эрсиль, эрзянь ушмантнэнь прячерест новолильть каряз витьс ды сынь ансяк сюлмавильть. Сехте ёроков цёрынетненень казевиль ваксар.

Озатясь ды лездыцянзо весень сувтылинзе ды чанстилинзе. Цёрынетне стильть кумажа лангс. Озатянть кедьсэ ульнесь штатол ды сувтамо. Ёвтавиль истямо озолма:

 Инешкипаз! Вере Чипаз! Покштят-покшават!
 Марямизь-неемизь, уледе мартонок,
 Совавтсынек (ёвтавить цёрынетнень лемест)
 Цёраксчис, ванстаст ды ветяст сынь раськенек,
 Эрямо тевтнень, улезт нардекс ды нильксэкс
 Раськенть икеле чизэнзэ. Ванстаст тиринь масторонть,
 Эрзянь коенть ды Инешкипазнэнь кемеманть.
 Улезт кеметь прок тумот, виевть прок овтот,
 Превейть прок покштяст ды тетяст.
 Инешкипаз, чангодть! Паз, чангодть!
 (Озатясь серьгеди цёрынетненень):
 Аноктадо, тынь, улемс раськень кеме нильксэкс?
 (Цёрынетне вейсэ серьгедить):
 Пингеде-пингес минь аноктано!

Озатясь сувтасы эрьванть ды мери:
– Ней тынь цёрат! 
Пазось чангодезэ тенк! 

Тейтерень ёрокчи

Мейле сы шка невтемс эсь пряст ды ёрокчист тейтернетненень. Тенст эрявсь невтемс викшнеманть, кудонь тевень топавтоманть, эйдень ваноманть-нурсеманть. Весе сынь сайсть мартост Раськень озксов тейтерень паргот, косо ульнесть викшневкст, эрьва кодат кедьёнкст, конат анокставкшность сынст кедьсэст. Те ульнесь теке неень шкань невтема. Маркужось пешкедиль мазычисэ. Тейтернетне невтнесть кода эряви сюлмсемс эйде, морамс лавсень моро ды лия мезе. Тейтернетнень аваст ды сырькаест те чинтень анокстакшность пулайть ды прясуреть. Тейтернетнененьгак максовиль омбоце лем. Саемга, кодамо сехте пек маштыцянтень путыльть лем Ламзурь ды седе тов. Велень Озаватне ды Прявт озатясь ютавтыльть тейтерьксчис совавтома кой. Тейтернетненень васенцеде сюлмавиль пулай ды прязост путовиль тейтерьксчинь прясуре. Те чистэнть саезь сынь анокольть улемс никс-полакс, секс мекс пек парсте маштыльть авань тевтнень топавтомо.

Озатясь ёвтыль истямо озолма:

 Инешкипаз, Вере Чипаз! Покштят-покшават!
 Неемизь-марямизь! Пшкадтяно тыненк!
 Ознотано икеленк,
 Вана неинк эрзянь раськенть,
 Эрзянь ломантнень чачтыцятнень,
 Кудонь тевень топавтыцятнень,
 Толонь каштомонь мельга ваныцятнень,
 Коцтонь кодыцятнень, ведень кандыцятнень,
 Мирдень-покштянь мелень топавтыцятнень,
 Улезт (ёвтавить весе тейтерькатнень лемест)
 Пингеде–пингес, эрзянь авань тевень топавтыцякс,
 Эйкакшонь чачтыцякс-кастыцякс, кудонь лембень кирдицякс,
 Пазонь коень, покштянь-покшавань лувонь ванстыцякс.
 Инешкипаз, чангодть! Паз, чангодть! Паз, чангодть!
 Весе сынь сувтавить Пазонь штатолсо ды сувтамопельсэ.

Покш ломанень пелькстамот

Седе тов ушодовить пелькстамот, косо эсь ёрокчист невтить покш ломантне. Тесэ бороцямот, налтонь ды торонь нолдамот, морамот-киштемат. Инязорось ды лия ломантне, Озатятне, кочкить ушмантнэнь ютксто сетнень, конатнень торосост понгавтозь ятонь сехте ламо ятонь прякиськеть.

Ушмантнэнень сюлмави маралянь мазый каркс, казеви од торо ды пряпутомка. Раськесь Маркужосонть моры-кишти, содыцятне пичкавтыть ормат. Таго маряви дорамонь гай.

Эрзянь Атянь Эзем

Атянь Эземс пурнавильть сехте мельвановикс ломантне. Тесэ арсевильть ламо кевкстемат. Саемга, ладявильть буетнень ютксо модань явома пелькстамотне, лангс ливтевильть раськестэнть сеть ломантне, кие тейсь кодамояк зыян эли кияк салась лиянь парочи. Те салыцясь аравтовиль зярыя иес важокс. Тесэ весе, мезесь ульнесь ливтезь лангс, сонсь Инешкипазось, Покштятне-сэрдятне, Кирдийтне-аштийтне ульнесть озксов сыцятнень марто. Ды весемесь арсевиль вейсэ. Арсевкшнесь зяро сюро, ракшань серькат эрявить каямс те эли тона буень пельде масторонь тевтнень ветямга ды ушмонь кирдемга. Те ульнесь Ине промкс, Инекужо, истят вейсэнь покш промкст эрсильть чуросто. Паряк тесэ кочкавильть ушмодеень прявтт, чинязт ды сонсь Инязорось. Тесэ кияк апак пеле кортыль седе, мезе талновтсь седеензэ. Инжетне ёвтыльть сюкпря буень сеть ломантненень, косо ютавтозель те Раськень озксось. Нама, арсевиль сы Раськень озксонь ютавтома таркаськак.

Лемень кундамонь ям ды каша

Атянь Эземесь прядовиль, сыль шка кундамс Покштятнень-сэрдятнень лемест. Тень туртов анокстазель лемень кундамонь ям ды каша. Ломантне моданть ланга састыне ацыльть викшнезь руцят, озыльть ды ушодовиль лемень кундамось. Цёраксчис ды аваксчис совавтозь од ломантне якильть ды кайсильть лемень кундамонь ям, макснильть кши-сал. Озатятне ды Кудонь Покштятне саилизь яндаваст штатолонть марто ды кирвазтилизь сонзэ озксонь штатолсто. Эрьвась эсь пачканзо энялдсь Инешкипазонть икеле седе, мезесь тензэ эрявсь.

Прядомат-пурнамот

Моданть лангсто састыне пурнавильть руцятне. Маркужось парсте ванькскавтовиль. Буень ломантне ознозь Маронть ды Пазонь штатолонть перька тейнильть зярыя ютамот. Озксонь ветицятненень ды сынст лездыцятненень ёвтыльть сюкпря ды максыльть казнеть, путыльть каявкс Озкспаргонтень. Истя прядовиль эрзянь раськенть сехте питней ды валдодо пешксе озксось–коесь. Нама, неень шкань эрзятненень эряви весементь ванстомс ды кастомс.

Раськень озксонь ютавтома коесь вейсэнди эрзятнень ды сюпав коенть. Раськень озксось невти эрзянь раськенть домка вановтонзо.

Те сёрмадовксонть анокстамсто лездасть Маризь Кемаль[2], Нуянь Видяз сёрмадыцятне, Кшуманцянь Пиргуж[2] Покш Игнадбуень Ташто Кшуманця велень эрицясь, "Торама» морокуронь морыцятне ды Йовлань Оло "Торама" морокуронь ветицясь[2], Аношонь Тумай Обран ёнксонь Лукоянов ошонь эрицясь. Сюкпря Покш Игнадбуень весе эрицятненень, конат 370 иень ютазь 1999-це иестэ Чукалонь пандосонть [2] вельмевтизь Раськень озксонть.

Теде башка лездасть А. Шахматовонь, М. Евсевьевень, П. Печерскоень сёрмадовксост. Ансяк весе вейсэ эрзятне виевть ды мазыйть. Инешкипазонь чанстесь ды покштятнень таштазь эрямонь сюпавчись кармить ветямо икелев.

Моронь кунсолома

Зярдо прядови озномась, весе ярсыть пидезь ямдо ды кунсолыть покш морыцянь невтема. Раськень озксов эрьва кодамо иестэ сакшность: Г.И. Сураев-Королёв лемсэ «Келу» фольклоронь морокурось, «Торама», «Мерема» «Гайги вайгель», «Морденс», Анатолий Глухов, Раутонь Видяй, Бакич Видяй, Андрей Бочканов, Артём Мамаев[3] ды лият.

Ваномат

Сёрмадовкст

  1. Пшкадема Покштятненень ды Покшаватненень (эрз.)
  2. 2,0 2,1 2,2 2,3 Саберов Р. А. ЖРЕЧЕСКАЯ ТРАДИЦИЯ МОРДВЫ В XVIII–XXI ВЕКАХ(руз.)
  3. finugor.ru //Раськень озкс на земле Эрзянь Мастор(руз.)