Тонавтнема ие
| Тонавтнема ие | |
|---|---|
 «Протон» школасо покшчинь промкс, 2017-це иень таштамковонь 1-це чи | |
| Косо нолдави тевс | Тонавтомасо |
Тонавтне́ма ие (руз. Уче́бный год) — те шкань пелькс, конась тонавтома таркатнесэ невти тонавтнемань тевенть кувалмонзо[1].
Кодамо смустезэ
«Тонавтнема ие» чарькодемась максови кода иень перть тонавтнема тевень цикла.
Тонавтнема иетнень тешкстыть мельга-мельцек молиця ковкерьксэнь иетнень номерсэ, конань лангс сави тонавтнема шкась. Саемга, «тонавтнемань 2025/2026-це ие»[2].
Тонавтнема иенть кувалмозо
Тонавтнема иень ушодовомась ды прядовомась эрьва кодамо мастортнэсэ а моли вейке омбоце ёнов. Явозь шкась кемекстазь масторонь законодательствасо. Тонавтнемань ушодовомань ды прядовомань читнень тонавтнема таркась сеедьстэ кемексты сонсь[3].
Европань мастортнэсэ тонавтнема шкась ушодови умарьковсто — таштамковсто ды прядови панжиковсто — аштемковсто. Невтемга, умарьковонь куншкавидьстэ ушодыть важодеме школатне Даниясо, Финляндиясо, Швециясо, таштамковонь васенце пельксстэнть — Австриясо, Франциясо, Испаниясо, Италиясо. Германиясо ды Швейцариясо эрьва региононть мелензэ коряс тонавтнема иесь ушодови кода умарьковонь куншкасто, истя таштамковонь прядовомстояк[3][4].
Американь Вейсэндязь Штаттнэсэ ды Канадасо вейке вешема арась. Читне кемекставить штатонь/провинциянь законодательствасо, ансяк тонавтнема таркатнесэ тонавтнемась устави сёксень ушодовомсто ды прядови кизэнь ушодовомсто[3].
Латинской Американь кой-кона мастортнэсэ тонавтнемань васенце чись сави даволковонь ушодовомас (Аргентинасо, Бразилиясо, Коста-Рикасо). Чилисэ тонавтнема иесь ушодови эйзюрковонь 1-це чистэ, Кубасо ды Мексикасо — таштамковонь ушодовомсто.
Австралиясо ды Од Зеландиясо эйкакштне ушодыть тонавтнеме якшамковонь пестэ — даволковсто[3].
Африкань мастортнэсэ тонавтнемань ковкерькстнэ явовить. Саемга, Южно-Африканской Республикасо ды Танзаниясо тонавтнема иесь ушодови якшамковсто, Судансо — эйзюрковсто, Алжирсэ, Туниссэ, Египетсэ, Мароккосо, Эфиопиясо, Сомалисэ, Нигериясо — таштамковсто.
Азиясояк арась вейкетьксчи. Саемга, таштамковонь 1-це чистэ тонавтнема тевесь ушодови Китайсэ, Монголиясо, Казахстансо, Киргизиясо, Таджикистансо, Туркменистансо, якшамковонь 2-це чистэ — Сингапурсо, эйзюрковонь васенце читнестэ — Южной Кореясо, чадыковонь 1-це чистэ — Кореянь Народно-Демократической Республикасо (КНДР-сэ), панжиковсто — Таиландсо, аштемковсто — Филиппинат масторсо, медьковсто — Индиясо ды Непалсо ды седе тов[3].
Россиясо
Тонавтнема иень перть тонавтнемась моли вейке школань ве классо, вузонь эли средней специальной тонавтнема таркань ве курссо.
Россиясо очной формасо тонавтнема иесь ушодови таштамковонь 1-це чистэ, конань лемдить «Содамочинь чи». Тень лангс апак вано тонавтнема тарканть мелензэ коряс тонавтнема иенть ушодовомазо кандови лия чис, ансяк кавто ковдо аволь седе позда[5].
Очно-заочной ды заочной форматнень коряс тонавтнема иенть ушодовоманзо кемексты тонавтнема таркась.
Прядови тонавтнема иесь тонавтнемань планонть коряс, конань кемекстасы тонавтнема таркась[1]. Школатнень нолдавиця класстнэсэ тонавтнема тевесь прядови итоговой аттестациясо[6].
2025-це иестэ Россиянь Федерациянь Просвещениянь министерствась тейсь ды кучсь регионтнэс школатнесэ отечественной кинематографонь тонавтнемга методикань рекомендацият. Школань программанть туртов эрявикс фильмань списканть пурнызе Россиянь Федерациянь Президентэнть пингстэ Культурань ды искусствань советэсь. Те спискантень совасть 100 фильмат, конатнень теизь отечественной режиссёртнэ.
Тонавтомань циклатне
Школатнесэ
«Россиянь Федерациясо тонавтомадо» закононть коряс[7] школатненень мереви эстест кемекстамс тонавтомань циклатнень — четвертень, триместрань эли биместрань коряс тонавтнеманть[8]. Тонавтнема иень истят явовоматне улить лия мастортнэсэяк[9].
Четверттне
Четвертень системась яви тонавтнема иенть ниле пельксэс[10]:
- васенце четвертесь — таштамковсто саезь ожоковонь пес;
- омбоце четвертесь — сундерьковсто саезь ацамковонь пес;
- колмоце четвертесь — якшамковсто саезь эйзюрковонь пес;
- нилеце четвертесь — чадыковсто саезь панжиковонь пес.
Тонавтнемань четвертной системанть пингстэ школасо тонавтницятне тукшныть каникулас иезэнзэ нилексть[8].
Триместратне
Триместрань (модулень) системанть пингстэ тонавтнема иесь явови модульс «5 + 1» лувонть коряс: тонавтнемань вете таргодо мейле моли каникулань вейке тарго[10].
Биместратне
Тонавтнема иесь явови тонавтнемань вете периодс (биместрас) сисем таргонь перть, ютксост — кавто таргонь кувалмосо каникулань вете пелькст. Котоце биместрась — кизэнь каникулатне, конат молить кавто ковт[8].
Колледжтнесэ ды вузтнэсэ
Тонавтнемань средне-специальной ды высшей таркатнесэ тонавтомань тевень онкстамокс ашти семестрась («sēmestris» («*secsmestris») латинэнь кельстэ саезь «semestre» французонь кельстэ валонть вельде, кона ютавтови кода — «кото ковонь»). Вейсэндявозь вариантсо вейке семестрась — те пельие. Тонавтнема шканть прядовомсто аравтови экзаменэнь максомань сессиясь[11].
Каникулат
Тонавтнема иентень совить каникулатнеяк — тонавтнемань пингстэ шка, кона олякстомстозь тонавтнеманть эйстэ[2].
Каникулатнень кувалмост кемекстави тонавтомань вешемасо.
Тешкставкст
- ↑ 1 2 Вопрос: Что такое календарный год, что такое учебный год? Корректно ли говорить о "полугодиях" учебного года применительно к временным периодам с сентября по декабрь и с января по август и издавать приказы о выплате стипендий учащимся в соответствии с указанными временными рамками? (ответ службы Правового консалтинга ГАРАНТ, декабрь 2013 г.) (руз.). base.garant.ru. Дата обращения: 24 Таштамковонь 2025.
- ↑ 1 2 Сфера образования — документация (руз.). docs.istina.msu.ru. Дата обращения: 24 Таштамковонь 2025.
- ↑ 1 2 3 4 5 По школьному календарю: когда начинается учебный год в разных странах (руз.). Forbes.ru. Дата обращения: 24 Таштамковонь 2025.
- ↑ Как устроен учебный год в разных странах мира: где-то начинается в январе, а где-то летние каникулы – всего месяц (руз.). gol.ru (31 Умарьковонь 2022). Дата обращения: 24 Таштамковонь 2025.
- ↑ Учебный год начинается 1 сентября \ 2025-2024-2023 год \ Акты, образцы, формы, договоры \ КонсультантПлюс (руз.). www.consultant.ru. Дата обращения: 24 Таштамковонь 2025.
- ↑ Статья 59. Итоговая аттестация \ КонсультантПлюс (руз.). www.consultant.ru. Дата обращения: 24 Таштамковонь 2025.
- ↑ Статья 28. Компетенция, права, обязанности и ответственность образовательной организации \ КонсультантПлюс (руз.). www.consultant.ru. Дата обращения: 24 Таштамковонь 2025.
- ↑ 1 2 3 Ирина Кочковая. Триместры, четверти, модули, биместры в школе. В чем различие? (руз.) (5 Умарьковонь 2022). Дата обращения: 24 Таштамковонь 2025.
- ↑ Как устроены школы в разных странах мира (руз.). Известия (1 Таштамковонь 2017). Дата обращения: 24 Таштамковонь 2025.
- ↑ 1 2 Школьные каникулы 2025/2026. Расписание по четвертям и триместрам (руз.). РБК Life (18 Умарьковонь 2025). Дата обращения: 24 Таштамковонь 2025.
- ↑ Семестр: что это такое, сколько месяцев длится в учебном году в колледже, ВУЗе | Университет Синергия (руз.). synergy.ru. Дата обращения: 24 Таштамковонь 2025.