А. И. Полежаевень музей

Википедиясто материал - аорев содамкундосто
А. И. Полежаевень музей
Музей Полежаева.jpg
Зярдо панжозь 2001-це иень аштемковонь 5-це чистэ
Кода важоди 10.00 чассто саезь 17.00 часос, оймсема чись — пондельник. Эрьва ковонь меельце овторникесь — ванькскавтома чи
Аштема тарказо
Косо ашти Саран ош, Саранонь куро, 51-це кудо
Прявтось музеень ветицясь Шведкова В.С.
Сайтэсь vk.com/club180859083

А. И. Полежа́евень музе́й (руз. Музе́й А. И. Полежа́ева) — Мордовия Республикань Саран ошсо музей, кона алтазь Александр Иванович Полежаев (руз.) (эрз. XIX-це пингень рузонь валморонь сёрмадыцянть ледстнемга. Ловови 1941—1945-це иень Войнань ды трудонь подвигень мемориальной музеень филиалокс.

Музеесь топавты А. И. Полежаевень эрямонзо ды шкинеманзо тонавтнемга наукань ды ванномань тевенть, ашти валморонь сёрмадыцянть ды сонзэ шкань сёрмадыцятнень поэтикань ды эрямокинь ванстома таркакс, ловови А. И. Полежаевень ды Мордовиянь сёрмадыцятнень литературань тевкадовксонь кастомань куншкакурокс[1].

Кода ульнесь теезь музеесь

Музеень панжомадо мелесь-арсемась сась Алексей Михайлович Мамаев Ине Отечественной войнань ветеранонтень. 1993-це иестэ сонзэ вешеманзо коряс ошонь администрациясь явсь музеентень тарка — Семён Тимофеевич Мышкин микшницянть-рамсицянть кудо, кона стявтозель ХIХ-це пингень пестэ[2]. Кой-кодамо шка ютавтозь кудонь витемань-петемань тевтнень ды невтемань анокстамонть лангс. 2001-це иень аштемковонь 5-це чистэ Саран ошонь 360 иень топодемантень А. И. Полежаевень музеесь панжовсь сыцятнень туртов.

Невтема

Неень шкасто музеенть экспозициязо ашти вете нупальстэ. Музеень колмо нупальтне алтазь А. И. Полежаевень эрямонтень ды шкинемантень («Чачома ды эйкакшонь иетне», «Московсо тонавтнема иетне», «Валморонь сёрмадыцянть военной службазо ды эрямонь меельце иетне»), нилецесь — Мордовиянь сёрмадыцятненень, ветеце нупалесь ловови литературной гостиноекс, косо ютавтневить валморонь ловномань ды музыкальной чокшнеть, артыцятнень невтемаст ды эрьва кодат вастовомат.

Фотот

  • Николай Еремеевич ды Александра Петровна Струйскийть А. И. Полежаевень покштянзо ды сырькаензэ портреттнэ, теде башка Рузаевкасо малавикстнэнь усадьбанть икелень шкань фотот.

    Николай Еремеевич ды Александра Петровна Струйскийть А. И. Полежаевень покштянзо ды сырькаензэ портреттнэ, теде башка Рузаевкасо малавикстнэнь усадьбанть икелень шкань фотот.

  • Мордовиянь сёрмадыцятненень алтазь стендттнэстэ вейкесть

    Мордовиянь сёрмадыцятненень алтазь стендттнэстэ вейкесть

Тешкставкст

  1. ↑ Кулясь саезь буклетстэ, кона максневи музеень сыцятненень. Буклетэнь теицятне-пурныцятне: В. М. Ковшова музеень ветицясь, Л. В. Прончатова музейсэ наукань важодицясь
  2. ↑ Валморонь сёрмадыцядо ледстнема. Сёрмадовксось Н. А. Браницына А. И. Полежаевень музейсэ наукань важодицянть

Ссылкат

Саезь "https://myv.ruwiki.ru/w/index.php?title=А._И._Полежаевень_музей&oldid=541726"-стэ