Л. И. Воинов музыкань сёрмадыцянть кудо-музей

Википедиясто материал - аорев содамкундосто
Gerb-icon.png

Россиянь Федерациянь культурань министерства

Arrow-Right.png
Gerb-big.png
Россиянь Федерациянь
культурань министерства
Л. И. Воинов музыкань сёрмадыцянть кудо-музей
Дом-музей композитора Л.И.Воинова (г. Темников).jpg
Зярдо панжозь 1968-це иестэ
Аштема тарказо

МордовияFlag of Mordovia.svg Мордовия

РоссияFlag of Russia.svg Россия
Прявтось Позднякова Галина Николаевна
Сайтэсь mrkm.ru/muzey/filialy-mu…

Л. И. Во́инов му́зыкань сёрмады́цянть кудо́-музе́й (руз. Дом-музе́й компози́тора Л. И. Во́инова) (лиякс — «Л. И. Воинов музыкань сёрмадыцянть кудо-музей» «И. Д. Воронин лемсэ Мордовия Республикань краеведениянь вейсэндязь музей» культурань бюджетной государственной учреждениянь филиал) — «И. Д. Воронин лемсэ Мордовия Республикань краеведениянь вейсэндязь музей» культурань бюджетной государственной учреждениянь филиал. Ашти Мордовия Республикань Темниковань буень Темников ошонь Воиновонь куронь 8-це № кудосо[1].

Музеесь панжозель 1968-це иень медьковонь 5-це чистэ.

Музеенть ланга

Леонид Иванович Воинов (1898—1967) музыкань сёрмадыцянть, балалайкасо седицянть ды дирижёронть кудозо-музеезэ панжозель Темниковсо 1968-це иень медьковонь 5-це чистэ Мордовиянь Автономной Советской Социалистической Республикань (МАССР-нь) Министрань советэнь 447-це № кармавтомасо[2].

Музеенть покш панжомазо ютась 1969-це иень медьковонь 13-це чистэ ды алтазель Леонид Воиновонь чачома чистэнзэ 71-це иентень. Кудось стявтозель 1954-це иестэ музыкань сёрмадыцянть тетянзо-аванзо усадьбасо[3]. Те кудонть эйсэ Л. И. Воинов эринзе кемголмово меельце иетнень[2].

Музеенть васенце экспозициязо аштесь музыкань сёрмадыцянть кудораськензэ мемориальной кавто комнатань ды невтемань нупальстэ, косо стенатнень ды невтема вальматнень лангсо ульнесть Л. И. Воиновонь эсензэ архивстэ фотот ды тевконёвт. Седе тов музеень фондтнэ свал сюпалгадовкшновсть экспонатсо, конатнень макснесть музыкань сёрмадыцятне, малавикстнэ, ялгатне ды содавикстнэ[3].

1971-це иестэ усадьбасо витнезель Анна Николаевна — Л. И. Воиновонь аванзо кудозо, ков кандызь музеень невтемань нупальстэ материалтнэнь. Малавикстнэнь ледстнемаст коряс музыкань сёрмадыцянть кудонзо олякстомтомадо мейле потсо весе нупальтнесэ теезель икелень обстановкась. Истямо ёнксось кадовсь неень шкас[3].

Иезэнзэ музеентень сакшныть 600 ломанть.

Кудонть-музеенть прявтозо — Позднякова Галина Николаевна[1].

Кодат невтемат ютавтневить

Музеень экспозициясь содавты Л. И. Воинов Темниковсо чачозенть, музыкань сёрмадыцянть эрямонзо ды важодеманзо марто. Музеенть экспозициянь 60 кавонзазь метрань площадьсэ аштить 200-то ламо алкуксонь экспонатт[3].

Экспозициянь васенце пелькссэнть невтевить тевконёвт ды фотот: чачомадонзо свидетельства, тетянзо-аванзо марто васенце фото, кона теезель 1904-це иестэ.

Экспозициясонть невтезь Л. И. Воиновонь истят произведениянзо: «Сказ о Мордовии», «Мордовский марш», «Мордовская рапсодия», «Мордовские напевы», балалайка марто оркестрань туртов кавто концертт (1945-це ие, 1951-це ие) ды лия произведениятне[3].

Невтема вальмасонть — оркестрань эрьва кодамо составонь фотот, эрьва кодат оштнесэ оркестранть выступлениянзо ды ардтнеманзо. Башка таркасо Л. И. Воиновонь награданзо — МАССР-нь Верховной Советэнь Президиумонь шнамо конёвтне истят покш лемтнень максомадо: «Мордовиянь АССР-нь заслуженной артист» (1943-це ие), «Мордовиянь АССР-нь раськень артист» (1947-це ие), «РСФСР-нь искусствань заслуженной важодиця» (1960-це ие), «Трудонь доблестень кис» медаленть марто удостоверения (1967-це ие).

Мемориальной кудосо музеень инжетне васня совить ярсамо таркас, косо кувака туворонть лангсо ашти музыкань сёрмадыцянть вечкевикс чакшкезэ ды самоварозо. Кудось содави инжень вастомасо, косо пурнавкшновсть артыцятне, музыкань сёрмадыцятне, валморонь ды ёвтнемань сёрмадыцятне, оркестрасо седицятне.

Вейке невтема вальмасонть улить Л. И. Воиновонь ялганзо фототне: Александр Борисович Гольденвейзер (руз.) (эрз. музыкань сёрмадыцянть, профессоронть, СССР-нь раськень артистэнть (1875—1961) ды Борис Сергеевич Трояновский (руз.) (эрз. музыкантонть, балалайкасо пек парсте седицянть (1883—1951), ялгатнень мелест-арсемаст марто сёрмадозь портреттнэ, конат казезь Л. И. Воиновнень. Скульптурань теевкстнэнь ютксо невтезь Воиновонь бюстозо, конань 1989-це иестэ теизе Н. А. Рачков артыцясь[3].

Покш таркасо кудосонть саи Л. И. Воиновонь портретэзэ, конань 1963-це иестэ сёрмадызе Е. А. Ноздрин артыцясь (1920—1977). Леонид Иванович невтезь эсь кудосо, зярдо ашти важодемань туворонзо экшсэ вальманть вакссо, кона лиси цветиця садпирентень[3]. Тетянзо-аванзо марто васенце фотось теезь 1904-це иестэ[3].

1918-це иестэ Рузонь раськень седямопелень оркестрань пурнамонтень-теемантень алтазь музеенть пелькстнэстэ вейкесь. Куншкасо — 1918-це иень панжиковонь 31-це чистэ ютавтозь концертэнь васенце афишань копиясь, оркестрасо васенце седицятнень фотост: Н. П. Исаевень, И. А. Мельниковонь, Немцов Николай Петровичень. Музейсэ невтезь вишка домра, конань 1918-це иестэ теизе Николай Немцов оркестрасо седицясь. Теде башка невтезь басовой балалайка, конань 1910-це иетнестэ теизе Семён Иванович Сотский Московсто мастерэсь. Пюпитрасо — Воиновонь дирижёронь мандынезэ ды нотань рукописезэ. Невтезь клавишань гуслятне, конат теезь ансяк те оркестранть туртов 1930-це иетнень ушодкссто Московсо. Гуслятнесэ музыкань сех васенце произведениятнень невтицятнень ютксто кармась Анна Ильинична Холопова[3].

Эрзянь ды мокшонь ламо артыцятне эрясть Воиновонь марто ялгаксчисэ ды казнесть эсь важодемаст. Сынь невтевить музыкань сёрмадыцянть кабинетсэ. Те В. Д. Илюхинэнь (1923—2007) ды В. Д. Хрымовонь (1908—1958) чачома масторонь этюдтнэ. Вейке этюдсо ули истямо сёрмадовкс: «Вечкевикс Леонид Ивановичнень минек ялгаксчиденть ледстнемга. 58-це ие. В. Хрымов»[3].

Музыкань седицянть нупальсэ ули ламо мезе: балалайка, пианина, конань казизе МАССР-нь культурань министерствась оркестрань 40 иетненень, фотосонть Фридерик Шопен (руз.) (эрз. музыкань сёрмадыцянть бюстонзо вакссо кудораськень оймедькс — «OTTO MIGGE, London» сёрмадовконть марто 1898-це иень кайга. Теске ашти чернилань кирдема тарка, конань Воиновнень казизе А. Б. Гольденвейзер. Малавикстнэнь ледстнемаст коряс, икеле чернилань кирдема таркань азорокс ульнесь Лев Николаевич Толстой. Нупальсэ вальманть вакссо — важодемань тувор, книгань полкат ды сёрмадозь мельтнень-арсематнень марто книгат, фото марто кудораськень альбом, Фёдор Шаляпинэнь (руз.) (эрз. пластинканзо марто граммофон ды лия мезе, кона кортась музыкань сёрмадыцянть ланга[3].

Воиновонь кода музыкань сёрмадыцянь кастомадо ёвтнить «Сказка о попе и работнике его Балде» Леонид Ивановичень васенце оперань рукопистне (1924-це ие), «Лесные сцены» оперань (1926-це ие) ды «Сахарок» музыкальной комедиянь (1930-це ие) сюитатне[3].

Тешкставкст

  1. ↑ 1 2 Государственный каталог Музейного фонда Российской Федерации (руз.). Госкаталог.РФ. Дата обращения: 10 Якшамковонь 2025.
  2. ↑ 1 2 Мемориальный дом-музей композитора Л. И. Воинова (руз.). Культура.РФ ©. Дата обращения: 10 Якшамковонь 2025.
  3. ↑ 1 2 3 4 5 6 7 8 9 10 11 12 Дом-музей композитора Л.И.Воинова (г. Темников) (руз.). Мордовский республиканский объединенный краеведческий музей имени И. Д. Воронина ©. Дата обращения: 10 Якшамковонь 2025.

Ссылкат

Саезь "https://myv.ruwiki.ru/w/index.php?title=Л._И._Воинов_музыкань_сёрмадыцянть_кудо-музей&oldid=541501"-стэ