Микшнемань важодицянь чи
| Микшнемань важодицянь чи | |
|---|---|
 Микшнема таркань важодиця | |
| Типесь | Профессиональной |
| Аравтозь | 2013-це иень панжиковонь 17-це чистэ |
| Тешкстави | эрьва иестэ |
| Тешкстамонь чись | медьковонь нилеце субутасто |
| Мезе марто сюлмазь | микшнема марто |
Ми́кшнемань важоди́цянь чи (руз. День рабо́тника торго́вли) — покшчи, конань эрьва иестэ медьковонь нилеце субутасто тешкстыть микшнемань отраслясо важодицятне.
Покшчинть прявт смустекс ловови микшнемасо важодицятнень тевест тешкстамось, неть ломантненень паро важодемань кис сюкпрянь ёвтамось, масторонь экономиканть туртов микшнемань ёнксонь эрявиксчинть невтемась.
Косто саевсь покшчись
Микшнемань важодицянь покшчись васенцеде аравтозель 1966-це иестэ СССР-нь Верховной Советэнь Президиумонь кармавтомасо[1]. Сестэ покшчинть текшстасть медьковонь меельце таргочистэ.
1988-це иень сундерьковонь 1-це чистэ кемекстазель од кармавтома, конань вельде Микшнемань важодицянь чинть вейсэндизь Жилищно-коммунальной хозяйствань ды эрицятнень бытовой обслуживаниянь важодицянь чинть марто[2]. Истя появась Микшнемань, эрицятнень бытовой обслуживаниянь ды жилищно-коммунальной важодицянь чись. Сонзэ кармасть тешкстамо эрьва иестэ эйзюрковонь колмоце таргочистэ.
2013-це иестэ Микшнемань важодицянь чинть явизь Жилищно-коммунальной хозяйствань ды эрицятнень бытовой обслуживаниянь важодицянь кавто башка покшчис. Россиянь Президентэсь кемекстызе те покшчинь ютавтома шканть — медьковонь нилеце субута[3]. Жилищно-коммунальной хозяйствань ды эрицятнень бытовой обслуживаниянь важодицянь чинть туртов кадызь секе шканть — эйзюрковонь колмоце таргочинть[4].
Кода тешкстави
Микшнемань важодицянь чистэ поздоровт ёвтавить весенень, кить сюлмазь те ёнксонть марто — микшницятненень, кассиртнэнень, предпринимательтненень, менеджертнэнень, товароведтнэнень, консультанттнэнень ды лия специалисттнэнень. Коень коряс истямо чистэнть те сферасо важодицятненень ёвтыть сюкпря сынст важодемаст кис. Ломантне вастневить ялгаст эли малавиксэст марто, конат важодить микшнемань отраслясо. Гайневтить малавикстнэнень телефононь эли видеогайневтемань вельде ды ёвтыть поздоровт[5].
Теде башка Микшнемань важодицянь чинть тешкстамсто ютавтневить покшчинь мероприятият ды тувор экшсэ аштемат, конатнес пурнавить микшнемань, услугань сферань ды жилищно-коммунальной хозяйствань сферасо важодицятне, сынст малавиксэст ды ялгаст.
Сех вадря важодицятненень максовить шнамо конёвт, сюконямонь сёрмат, казнеть. Микшнемань вейсэндявкстнэ казить важодицяст премиясо, ютавтневить корпоративть[6].
Покшчись тешкстави Олячинь Масторонь Вейсэндявксонь (СНГ-нь) лия мастортнэсэяк[7].
Кода сюлмазь лия покшчитнень марто
Панжиковонь омбоце субутасто тешкстыть Масторлангонь виде микшнемань чи (англ. World Fair Trade Day)[8].
Эйзюрковонь 15-це чистэ — Рамсицятнень праваст идемань раськеютконь чи (англ. World Consumer Rights Day), конань кемекстызе Раськень Вейсэндявксонь Организациясь (ООН-сь).
Историянь факттнэ
- Куншкань пингетнестэ микшнемань тевенть сех сеедьстэ ветясть цёратне, ансяк неень шкасто отраслясо седе ламо важодить ават.
- Кезэрень Русень микшнемань прявт маршрутонть ульнесь лемезэ «варягсто грекс»[9]. Славянтнэ микшнесть мехть, кедь, медь, рамсесть коцтт, суликат ды питней кевть.
- XVII-це пингень ушодовомас Московсо Якстере площаденть лемдясть Торгокс — те ульнесь микшнемань содавикс тарка.
- 1893-це иень ацамковсто Якстере площадьсэ панжозельть Микшнемань верце рядтнэ (ней Государственной универсальной микшнема тарка (ГУМ)) — Европасо покш тарка, лиякс меремс, кудо потсо аштиця микшнемань куро[10].
Россиянь профессиональной покшчитне | |
|---|---|
| |
Тешкставкст
- ↑ 22 июля — День работника торговли в России: когда отмечается и кто празднует. «МИЦ «Известия» (21 Медьковонь 2023). Дата обращения: 25 Аштемковонь 2024.
- ↑ День работника торговли в России. ТАСС (22 Медьковонь 2023). Дата обращения: 25 Аштемковонь 2024.
- ↑ Указ Президента РФ от 7 мая 2013 г. N 459 "О Дне работника торговли". Информационно-правовой портал "ГАРАНТ.РУ" (20 Панжиковонь 2013). Дата обращения: 25 Аштемковонь 2024.
- ↑ О празднике "День работников торговли, бытового обслуживания населения и жилищно-коммунального хозяйства". Министерство труда и социальной защиты Российской Федерации (27 Эйзюрковонь 2020). Дата обращения: 25 Аштемковонь 2024.
- ↑ 22 июля — День работника торговли. Информационный центр "Вольская жизнь" (22 Медьковонь 2023). Дата обращения: 25 Аштемковонь 2024.
- ↑ Департамент экономического развития Курганской области. Департамент информационных технологий и цифрового развития Курганской области. Дата обращения: 25 Аштемковонь 2024.
- ↑ День работников торговли. ГУ "Республиканская научно-техническая библиотека". Дата обращения: 25 Аштемковонь 2024.
- ↑ Ульяна Светачева. День работников торговли в 2024 году: история и традиции праздника. Комсомольская правда. Дата обращения: 25 Аштемковонь 2024.
- ↑ Татьяна Григорьева. Кто инициировал путь "из варяг в греки"? Портал «Культура.РФ». Дата обращения: 25 Аштемковонь 2024.
- ↑ История ГУМа. ГУМ. Дата обращения: 25 Аштемковонь 2024.