Строицянь чи

Строицянь чи
Строицянь чи
	Файла:Строицянь чи.webp
Типесь	Профессиональной покш чи
Смустезэ	тешкстамс строицятнень тевест эрявиксчинть ды сынст путовксост масторонок касомантень
Тешкстави	эрьва иестэ
Тешкстамонь чись	умарьковонь омбоце таргочистэ
	Строицянь чи

«Строицянь чи» — строямонь тевсэ важодицятнень профессиональной покш чист. Тешкстави эрьва иестэ умарьковонь омбоце таргочистэ Россиясо^[1] (седе икеле СССР-сэ) ды зярыя лия мастортнэсэ, конат ульнесть Советской Союзонь республикакс.

Строицясь кирьпецень путомсто

Историязо

Строителень проспектсэ «Строитель» ДК-нть стенасо «Строитель» барельефесь

1955-це иень таштамковонь 6-це чистэ лиссь «„Строицянь чи“ эрьва иестэ тешкставиця покш чинь кемекстамодо» СССР-нь Верховной Советэнь Президиумонь Указось^[2].

Покш чинть кемекстамодо мелесь сась КПСС-нь ЦК-нь Васенце секретарентень Н. С. Хрущёвнень, кона покш мельспаросоль Жигулёвской ГЭС-нть стявтоманзо кувалма, мезесь пачтизеяк тевенть СССР-нь Верховной Советэнь Президиумонь Указонь нолдамонтень.

1956-це иень умарьковонь 12-це чистэ Советской Союзонь строицятне васенцеде тешкстызь профессиональной покш чист.

СССР-нть каладомадо мейле «Строицянь чись» кода профессиональной покш чи икеле ладсо тешкставкшны умарьковонь омбоце таргочистэ Россиясо, Украинасо, Белоруссиясо, Армениясо, Киргизиясо^[3], Казахстансо^[4].

2011-це иестэ саезь Российской Федерациянь регионтнэнь кастомань Министерстванть мельс самонзо коряс Строицянь чись Россиясо яволявтозь федеральной покш чикс^[5]^[6]. 2016-це иень умарьковонь 14-це чистэ Россиянь строицятне тешкстызь юбилейной, 60-це, Строицянь чист. Тешкстамонь прявт мероприятиякс кармась улеме сехте паро важодицятнень каземась. Покш чиденть икеле Российской Федерациянь строямонь ды эрямо таркань кирдемань министрась М. А. Мень ютазь ды молиця иестэнть строицятнень топавтовкстост кортамсто тешкстызе: «Строицятнень туртов теевить од лувт, касы архитектортнэнь покшчист, кемекставить эрямо таркань парочинь неень шкань стандартт. Весе те лезды ванстомс бюджетэнь ярмактнень ды шождалгавтомс важодеманть, ансяк сехте эрявиксэсь — теемс седе парокс ломантнень эрямост.»^[7]

Советэнь шкань кулялопатнестэ покш чиденть цитатат

«Минек, строицятнень, течи покш чинек! Кулялопатне ды радиось масторонь келес сравтнизь пачтямонть седе: партиясь ды правительствась кемекстызь строямонь тевенть паролгавтомадо аравтоманть. Теке шкасто лиссь эрьва иестэ тешкставиця „Строицянь чиде“ СССР-нь Верховной Советэнь Президиумонь Указось. Эсь масторонок, эсь тевенек кувалма каштанчись ды эйстэнек, строицятнеде, мелявтоманть кисэ партиянтень ды правительствантень сюконямонь пси валтнэ пештизь седеенек…»
«Васенцеде течи тешкставиця Строицянь чись ней сови ковкерьксэс кода вейсэнь покш чи».
«Московось тешкстызе строицянь покш чинть вейсэнь киштемасо-морамосо, выставкасо, докладсо ды лекциясо. Сехте ламо ломанть пурнавкшность М. Горький лемсэ Культурань ды оймсемань центральной парконтень. Тесэ ютась прявт ошонь Ленинэнь буень строицятнень промксост, сынь теизь МГУ-нь зданиянь архитектурань ансамблянть, прявт ошонь Лембе-Чивалгома ёно эрямо кудонь кварталтнэнь, В. И. Ленин лемсэ стадиононть, косо ней кепедезь СССР-нь раськетнень Спартакиадань флагось. Буень строицятне арсить анокстамс ацамковонь 20-це чинтень эрямо таркань 210 тёжат м²».
«Таргочистэ Челябань культурань ды оймсемань парконть пештизь малав ниленьгемень тёжат строицят. Тесэ ютась митинг…»
«Баку. Тесэ ютась Строицянь чинтень алтазь Важодицянь депутатонь Баку ошонь Советэнь ды партиянь, советской ды общественной организациянь покш промкс. Промксонтень сакшнось Уругваень парламентэнь делегациясь, кона ульнесь инжекс минек масторсо…»

Строицянь чинтень панжозь объектт

СССР-нть шкасто покш объектэнь панжоманть аволь чуросто кандылизь Строицянь чинтень. Панжомась ютавтовиль покш чистэнть, чиде-кавтодо икеле эли чиде-кавтодо мейле. Невтемга, СССР-нь оштнень метрополитентнэсэ панжозельть:

1960-це иень умарьковонь 13-це чи, Ленинград — Площадь Восстания станциянь модалангонь омбоце вестибюлесь, кона нежедсь Московонь вокзалонтень.
1969-це иень умарьковонь 11-це чи, Москов — Горьковско-Замоскворецкой линиянь ниле станция марто Каширская-Каховская пельксэсь.
1974-це иень умарьковонь 12-це чи, Москов — Калужско-Рижской линиянь Калужская ды Беляево станциятне.
1978-це иень умарьковонь 11-це чи, Харьков — Холодногорско-Заводской линиянь вете станция марто омбоце пельксэсь.
1984-це иень умарьковонь 11-це чи, Харьков — Салтовской линиянь вете станция марто васенце пельксэсь ды «Салтовское» ТЧ-2 метродепось.
1987-це иень умарьковонь 8-це чи, Горький — Автозаводская ды Комсомольская станциятне.

Неень шкане Россиясо тешкстамось

Строителень чистэ ютавтневить покш мероприятият. Покш оштнесэ панжовить инфраструктурань од объектт ды культурань учрежденият, ютавтовить чинтень ладиця концертт. Сынсест строицятнень улить зярыя башка коест. Невтемга, од важодицятнень лувс совавтомась: сыненст сэвема сал марто кшипалнэ, кона ашти «пондо салонть» чартявксокс (символокс), ды кирдемат кедест тол велькссэ, аволь шожда тевентень анокчист кемекстамга. Мейле од важодицясь ёвтасы строицянь клятванть, теке шкане сонзэ каска ланга аламодо вачкоить кирьпецьсэ^[8]^[9].

2009-це иень умарьковонь 9-це чистэ Строицянь чись пек келейстэ тешкстазель Московсо. «Манеж» невтемань центральной залсонть ютась концерт марто покш чокшне, ков сакшность прявт ошонь строямонь комплексэнь весе прявттнэ ды Ю. М. Лужков мэрэсь. Сонзэ васенце полавтыцязо В. И. Ресин ёвтась истят валт:

«Сехте покш сюкпря ёвтан ветерантнэнень: сынь теизь се юронть, конань лезэсэ меельце 20 иетнестэ минь топавтынек пек ламо. Мон кеман, минь изнятано. Минек ошонть прявтсо Юрий Михайлович Лужков мэрэсь, минек ошонь думась, кона неть иетнень перть топавтсь пек ламо аволь шожда тевть. Пек ламосо миненек лезды Российской Федерациянь президентэсь Дмитрий Анатольевич Медведев, Российской Федерациянь Правительствань председателесь Владимир Владимирович Путин. Весе те максы кемема минек изнямонтень!»

2023-це иестэ Строицянь чись Московсо ютась умарьковонь 12-це чистэ ВДНХ-со. Масторонок прявт выставкась теевкшнесь таркакс, косо ютавтовсть покш чинтень алтазь мероприятият. Кизэнь кинотеатранть-лекториенть вакссо ошонь эрицятнень учость шкинемань мастер-класст ды спортонь эрьгелемат. Сыцятне кармасть содамо, кода стявтовить од кудотне, теевить китне ды метронь станциятне. Мероприятиясонть важодсть налксема марто тематической вете зонат, квестт, мастер-класст ды арт-объектт, конат ёвтнесть ошонь строямонь башка ёнкстнэде^[10]^[11].

Филателиясо

СССР-нь почтань марка
«Строицянь чи», 1956-це ие, номиналозо 40 коп.
«Строицянь чи», 1956-це ие, номиналозо 60 коп.
«Строицянь чи», 1956-це ие, номиналозо 1 рубль.
«Коммунизмань ине стройкатне»: Каховской ГЭС-сь, Южно-Украинской ды Северо-Крымской каналтнэ, номиналозо 20 коп.
Сталинградской ГЭС.jpg

«Коммунизмань ине стройкатне»: Сталинградской гидроэлектростанциясь (1951—1956), номиналозо 40 коп.
«Коммунизмань ине стройкатне»: Волго-Донской венчень укшнома каналось ды Ростовонь областень ды Сталинградонь областень лембе ёнксонь районтнэсэ валнома каналтнэ, номиналозо 30 коп.
«Коммунизмань ине стройкатне: Куйбышевень гидроэлектростанциясь (1950—1955)]], номиналозо 1 рубль.
«Коммунизмань ине стройкатне»: Туркменской прявт каналось (1951—1957), номиналозо 60 коп.