Автомобилистэнь чи

Автомобилень ды ошонь пассажирской транспортсо важодицянь чи
Типесь	Профессиональной покшчи
Аравтозь	Россиянь Федерациянь Президентэнь кармавтома
Тешкстави	Россия Россия
Зярдо ульнесь ютазь иестэ 2025	ожоковонь 27-це чистэ
Зярдо те иестэ 2026	ожоковонь 26-це чистэ
Зярдо карми иестэ 2027	ожоковонь 25-це чистэ
Зярдо тешкстави	эрьва иестэ, ожоковонь меельце таргочистэ
Ютавтомань койтне	масторонь прявттнэнь ды важодема таркасо прявттнэнь пельде ветицятнень туртов поздоровонь ёвтамо ды казнень максома

Автомоби́лень ды о́шонь пассажи́рской тра́нспортсо важоди́цянь чи́ (Автомобилистэнь чи, Ветницянь чи, Шофёронь чи) (руз. Де́нь рабо́тников автомоби́льного и городско́го пассажи́рского тра́нспорта (День автомобилиста, День водителя, День шофёра)) — автомобильной транспортонь ветницянь профессиональной покшчи, кона Россиянь Федерациясо эрьва ие тешкстави ожоковонь меельце таргочистэ.

Те покшчинть тешкстыть машинань ветницятне, робочейтне, инженерно-технической важодицятне ды служащейтне, автотранспортонь ды пассажирэнь автопредприятиянь прявттнэ, отраслевой наукань учёнойтне ды профильной тонавтнема заведениянь преподавательтне.

Историязо

Покшчись кемекстазель 2012-це иень медьковонь 25-це чистэ РФ-нь президентэнть 897 № ало кармавтоманзо коряс «О Дне работника автомобильного и городского пассажирского транспорта», ансяк сонзэ историязо ушодови СССР-нь шкатнестэ саезь, зярдо 1976-це иень якшамковонь 15-це чистэ эрицятнень яволявтомаст лангс каршо валокс кучозель СССР-нь Верховной Советэнь Президиумонть 2847-IX № ало «Автомобильной транспортсо важодицянь чи» эрьва иень покшчиденть кемекстамодо кармавтомась. Тешкстамонь чикс аравтозель ожоковонь меельце таргочись. 1980-це иень ожоковонь 1-це чистэ СССР-нь Верховной Советэнь президиумось 3018-Х-це № ало «О праздничных и памятных днях» кармавтомасонть кемекстызе покшчинь тешкстамонть.

1991-це иестэ СССР-нь каладомадонзо мейле икелень республикатне сынсь эсь мелест коряс путнизь те покшчинть: апак полавтово сон кадовсь ансяк Белоруссиясо, лия СНГ-нь мастортнэсэ сон полавтозель эли эзь тешкставо допрок.

Россиясо 1996-це иестэ саезь «Автомобилистэнь чись» вейсэндязель «Килангонь теицянь чинть» марто. Покшчинть лемезэ кармась «Автотранспортонь ды килангонь хозяйствань важодицянь чи». Ансяк 2000-це иестэ эйзюрковонь 23-це чистэ Россиянь президентэнть 556 № ало «Килангонь хозяйствань важодицятнень чиде» кармавтоманзо коряс кемекстазь покшчитне тагояк явозельть — Автомобильной транспортонь важодицянь чинтень ванстозель ожоковонь меельце таргочись, теке шкане Килангонь хозяйствань важодицятнень профессиональной покшчист кандозель ожоковонь колмоце таргочинтень.

2012-це иестэ саезь покшчинть официальной лемезэ полавтозель «Автомобильной ды ошонь пассажирской транспортсо важодицянь чи» лангс, ды тешкстамонзо кармасть ошонь транспортсо важодицятнеяк: трамваень, троллейбусонь ветницятне, автовокзалонь, метронь важодицятне ды лия специалисттнэ.

Автомобилистэнь чиденть башка Россиясо панжиковонь 29-це чистэ тешкставить Военной автомобилистэнь чи, конань тешкстыть военнослужащейтне ды РФ-нь автомобильной войскань важодицятне.

Кие тешксты

Те чистэнть ёвтыть поздоровт профессиональной водительтненень ды ошонь автотранспортонь важодицятнень — ломантненень, конат ветнить сталмонь усксема машинат, метронь поездт, автобуст, трамвайть, троллейбуст, таксить.

Сындест башка тешкстыть весемень, кить лездыть транспортонть витнеманзо-петнеманзо ды тееманзо марто: автослесартнень, механиктнень, шиномонтажниктнень, автомобильной инженертнэнь ды конструктортнэнь, прявттнэнь ды лия транспортной предприятиянь важодицятнень.

Шкань ютазь покшчись келейгавтызе эсь васенце смустензэ, ды сонзэ кармасть тешкстамо аволь ансяк профессиональной водительтне, истя жо весе сеть, кинь улить ветнемань праванзо ды эсензэ автомобилезэ.

Ютавтома коезэ

Пек келейстэ Автомобилистэнь чинтень ютыть тешкстамотне сеть оштнэсэ, косо аштить транспортонь пурнамонь-нолдамонь заводтнэ: Московсо, Нижний Новгородсо, Кургансо, Ульяновскойсэ, Тольяттисэ, Ижевскойсэ, Набережные Челны ошсо, Миассо ды лиясо.

Те чистэнть транспортной компаниятнесэ, конат топавтыть пассажирэнь ды сталмонь усксема тевтнень, ютавтовить мероприятият, конатнесэ важодицятненень макснить сюкпрянь сёрмат ды почётной грамотат. Покшчинтень максовить премият ды ярмаконь казнеть.

Покшчинь программантень совавтневить содавикс автомобилень парадт, концертт, зыянтомочинь коряс акцият, профмастерствань коряс пелькстамот (скоростной шиномонтаж, ремонт нурька шкас ды седе тов). Шофёронь чистэнть анокставить выставкат, конатнесэ сыцятненень ёвтнить автомобильной промышленностенть историядонзо, ды истя жо машинатнеде, кода сынь теевить ды важодить.

Казнеть

Те покшчистэнть автомобилистнэнень яла казить сынст туртов лезэв казнеть:

• автомобилистэнь набор (аптечка, огнетушитель, тешкс аварийной лоткамодо, сигнальной жилет, сур марто варьгат),
• ремонтонь туртов инструментэнь набор,
• автонь ваньксчинь кис комплект,
• чарынь ванстомань кис чехол,
• чары ланга тавадкст,
• буксировочной трос,
• коврикть ды чехолт,
• салононь туртов коштонь ванськавтомапель,
• GPS-системат,
• смартфононь кирдемапельть,
• пауэрбанкт,
• кирвазтемапелькст,
• автомагнитолат,
• видеорегистраторт,
• салононь туртов мини-пылесост,
• автомобилень мини-холодильникть,
• термокружкат;
• казнень сертификатт:
  • автосалонс,
  • автомойкас,
  • автосервисэс,
  • автотоваронь ды инструментэнь лавкатнес,
  • техосмотрань ютамос,
  • автонь обслуживаниянь коряс услугат.

Тешкставкс

Ссылкат

• Указ Президента РФ от 23 марта 2000 г. N 556 «О Дне работников дорожного хозяйства»
• Указ Президента РФ от 25.06.2012 N 897 «О Дне работника автомобильного и городского пассажирского транспорта»